Iimonene omuholike nando oku na HIV

Iipopiwa
Friday, 09 December 2016 328 Views 0 Comments
Iimonene omuholike nando oku na HIV

Konyala kehe gumwe okwa tseya Immanuel Sheefeni omunamimvo 32, ngoka eli omunandjungu moshinima shoHIV/AIDS.
Omunandjungu nguka okwa monikile ombuto yoHIV konyala omimvo ndatu dha piti nokwa li a popi nuutondwe kombinga yaakiintu nonkene a li a hala okutaandeleka ombuto ndjika nomwaalu ogundji ngaashi tashi vulika. Shika okwa li a hala oku shi ninga omolwiikonene. Oshe mu kutha ethimbo elele opo a lunduluke monkalo ndjika okuninga omunandjungu moku kwathela okugandja owino kombinga yoHIV/AIDS.

Nena Sheefeni okwa tseyitha wo kutya okwa ya mohole nomukiintu ena ombuto yoHIV. Sheefeni okwa mono omunamimvo 29 Princess Ndapanda Kandjeke ongo kuume ke.

“Kasha li sha pumbiwa ndi i holole. Okwa li eshishi nale.” Sheefeni osho a ti sho a pulwa kutya okwe shi ende ngiini opo a tseyithile kuume ke kutya okwa thikama peni nokukala ena oHIV. Utya aaholathani mbaka oyi yadha pongundu yambidhidhi yaamboka yena HIV/AIDS. Ha nale unene sho, Sheefeni a li na kuume ke omukiintu ngoka keena ombuto yoHIV.

“Ekwatathano lyandje mo nakuziwa olya li lyaashi ewanawa okuyeleka nongashingeyi. Ngiika ngashingeyi ondi uvite otwa faathana oshoka otuli mokambautu kamwe. Ngashingeyi ngame onda manguluka okuyeleka sho nda li mekwatathano lyonale. Eeno onda li mekwatathano lyohole, ihe paife opena elunduluko,” osho a ulike sho apulwa kombinga yekwatathano lyohole mo nakuziwa.

Kandjeke okwa lombwele Kundana kutya okwe shi tseya omasiku ga piti kutya okuna o HIV. “Oshinima shika osha adha ndje ohaluka, itandi ku fundju.Onda li nda lili noonkondo’ osho Kandjeke a popi. Utya ye okwa ningi ethimbo elele inee ki ikonakonitha kombinga yoHIV molwashoka okwa li ena uumbanda osho a fatulula. ”Onda kala ndi shi wete kutya otashiya, a fatulula kombinga yonkalo ya kuume ngoka a fekele kutya oye e mu pe ombuto, a ti kuume ke ngoka okwa li omuhasha ngele tashiya okuya momilalo, onkene okwa fekele kutya ngiika nguka oye e mu pe HIV/AIDS.

“Kena esiku a ulikile ndje komakwatathano gopankalathano ye ishewe okwa li e hole aakiintu. Okwa kala ishewe ha henuka okuya keikonakonitho, aluhe iipopile kutya okwa konakonwa nale,” Kandjeke a ti.

Ihe nando ongaaka kapena shoka tashi mu ngambeke oku mwenya nawa ngaashi ta vulu osho Kandjeke a ti.
“Omwaalu gwoCD4 dhandje oguli pombanda,” Kandjeke ngoka opo a tameke epango lyo HIV a ti. Uundhopi wooCD4, ethimbo limwe ohawu ithanwa uundhopi wo T-cells, nenge aakwatheli yo T ndhika odho oondhopi dhombinzi ontokele ndhoka odho hadhi longekidha omulandu gwegameno molutu okukondjitha oombakiteli, oofungi oshowo oku etelwa omikithi kombuto.

Oo CD4 dhomuntu ngoka ena oHIV ohadhi shuna pevi lwopiikando 45 oomwedhi hamano kehe. Nongele omuntu ngoka ina pangwa opena ompito oku adhika komikithi dhina ekwatathano noAIDS.

Sheefeni okwa ti oku uvite oye omunelago molwashoka haantu ayehe yena HIV haya mono ookuume mboka taya yi nayo mohole opo ya kale pamwe nayo.

“Okupopya oshili, oshinima shika osho eshongo enene. Kashishi oshipu nando. Osho oshidhigu dhoshili. Kashishi oshipu ngele yo ina yi ilongekidha oku ya puuyelele. Ngele oyi ilongekidha oku ya mekwatathano lyohole noku fundja kombinga yaampoka ya thikama noku yanda oku ka konakonwa oHIV oshinima oshipu.Ihe ngele oye na oshili okuholola mpoka ya thikama nena shika osho eshongo enene,”osho a ti kutya okwa hupithwa koku holoka puuyelele kutya ye okuna HIV.

“Otandi kumike mboka ye li mohole opo ye ki ikonakonithe omanga nooku li inaa ya tameka okuya momilalo, opo ya kale ye shi mpoka ya thikama okuza petameko” osho Kandjeke a fatulula kutya mekwatathano lye lyonale kuume ke okwa kala ena omaipopilo sho inaa vula okuya keikonakonitho lyo HIV.

Sheefeni naye ota ti oshiwanawa ngele omahewa mohole taga hololelathana onkalo yago yoHIV petameko lyekwatathano lyawo lyohole. Shika oshiwanawa okuyanda onkalo ye igililathano ndyoka tali ka eta oluhodhi ngele konima ehewa limwe olya ka tokola oku hulithapo ekwatathano uuna gumwe gwawo a monika ombuto omanga omukwawo keena ombuto.

“…Ngele owa tege okuholola mpoka wa thikama kombinga yombuto konima yokukala mohole uule woomwedhi hamano nena otashi ka kala oshidhigu na ishewe otashi ka ehameka kuume koye unene tuu sho wa li inoo mwi ihololela mpoka wa thikama,” Sheefeni a fatulula.

Kandjeke okwa ti kashishi oshipu opo omuntu ngoka ta lumbu nombuto yoHIV eshi holole puuyelele ku kuume ke omolwa onkalo yoku simononwa uuna omuntu wiipopi nenge onkalo yoku kala to ulikwa nomilungu uuna we ende paantu.Shika unene oshidhigu ngele omuntu nguka kena HIV, oshoka otashi vulika nguka a tule ehokololo ndyoka komalungula”osho a gwedhwa po
Omahewa ngaka oga thaneka okuhokana mbala. “Otwa hala okuhokana noku wilika ombelewa yandje yokugandja omayele kombinga yo AIDS molwashoka kuume kandje okuna onkatu moshimpungu sho HIV,” osho Sheefeni a ti. “Otatu hokana na otandi mu pe aanona yatatu,” osho Kandjeke a ti.

Sheefeni na Kandjeke oya ti aantu mboka taya lumbu no HIV/AIDS oyo iihakanwa yomo shigwana.
“Ontilo yoku holoka poshipangelo, noku tsakanena po nomushiinda shoye ngoka wo ena wo HIV ito kala wu shi kutya ye ota ka dhiladhila ngiini, unene tuu ngele ngoye omugundjuka ngaaka,” osho Kandjeke ati. Sheefeni okwa gwedhapo a ti aantu ohaya holeke mpoka ya thikama kombinga yoHIV molwashoka mbaka oye na uutile oku kala ya talikako ngiini na otaya longwa nayo ngiini.
“Pungame mwene ngame onda sinda oku talika nokunongonwa oshoka shika ihandi shipitika, ihe kaantu yalwe oku ulikwa nomilungu osho wo okunongonwa oshinima shili pombanda natango. Aantu oya tila natango oshoka ngele wa mono uutile momeho gawo opo to mono kutya mbaka oyena uumbanda okunongonwa noku ulikwa nomilungu, naashika osho tashi kaleke po omukalo mokati koshigwana okunongona noku ulika mboka yena HIV/AIDS nomilungu,” osho a ti.

Aantu oyena uumbanda oshoka inaya hala okukala oyo iipopiwa osho Sheefeni a gwedha po. “Otatu vulu okutya okunongonwa nokupopiwa okwa hula po ihe paushili aantu monkalamwenyo oya tila.Sho ngaa aantu taa pewa uuyelele owindji, shika otashi yeetele uutile uunene,” Sheefeni a ulike. Shoka shoshili ooshika kutya HIV/AIDS omukithi gwaantu ya hepa.

“Katuna aagandji yiiholelwa mboka tayi iholola oku gandja oshipala kombuto yo HIV/AIDS. Otwa pumbwa aanankondo mboka wo taya lumbu no HIV yi iholole noku popya kutya mbaka oyena omukithi nguka. HIV oya tseyika uuvu waantu mboka ya hepa. Kapena aayamba yena ombuto ye shiwike koshigwana yo otaya mwenya nawa. Moompito odhindji ohatu uvu ashike omanongono nenge omifofoto kutya ngandi omunenentu anuwa okuna ombuto,” Sheefeni a ti.

“Ulukila ndje omuwiliki gumwe nenge omuyamba ngoka eshi wike ena ombuto ndjoka.Kapena nando ogumwe oshoka kapena ngoka iholola naantu otaya si esiku kehe na ohaya gandja uusama komavu galwe gi ili,” osho a gwedha po.

Pamushangwa hokololo guukumwe gwIigwana Hangano nenge United Nations Programme on HIV/AIDS (UNAIDS) ngoka opo gwa tseyithilwe omasiku ngaka moNamibia okukwatwa ko HIV maakuluntu ohaku yi sigo opaakuluntu yeli (pomimvo 25-49), unene tuu mokati kaalumentu.

Muumbugantu wAfrika (Namibia a kwatelwamo], oshiponga shoku kwatwa ko HIV ohaku hulile konima yomimvo 25. Ooperesenda 50 dhaamboka aape ya kwatwa ko HIV odhili mokati kaalumentu mboka yeli pokati komimvo 30-49.

Sheefeni ota ti ke shi ngoka e mu pe ombuto ndjika. “Onkalamwenyo yandje yonale oya li ya vundakana, Ngame onda li nda nika evundakano. Ondali ndi hole oopaati nosho wo aakiintu, onda li handi hala aakiintu oyendji shaampoka ndayi,” osho a gwedha po.
Onkalamwenyo ye oya lunduluka konima sho a monika HIV. “Pethimbo ndyoka opo sheya mungame kutya onda pumbwa okutala kuukolele wandje na onda li nda ningi omapekaapeko nkene ndina okumwenya nawa nombuto,” Sheefeni a ti.

Monkambadhala yoku konga kutya olye ngiika emu pe ombuto ndjika, Sheefeni okwa li a pula aakiintu momakwatathano gopankalathano opo ngoka eshi kutya oye e mu pe ombuto iiholole. Ngoka ando eshi popile ando okwa pewa epandulo lyoodola omayovi N$ 20 000.

“Ihe kapena nando oongoka a holoka,” osho a ti.
Sheefeni okuza mpoka okwa taambako onkalo ye. “Kandina we iikonene naangoka a pendje ombuto ndjika,” osho a gwedhapo.

Leave a Reply

Your email address will not be published. Required fields are marked *