2016 – Omudo womahafo, oikumwifanima neefya

Eenguhudana
Friday, 16 December 2016 142 Views 0 Comments
2016 – Omudo womahafo, oikumwifanima neefya

Eshi omudo 2016 wa finda pexulilo, umwe ota tale ashike konima ye teli pula. Mutima u lile, mutima u yole, mutima upandule… Omudo 2016, omudo woshinamumwe.

Pamwe natu tameke koiningwanima tai halula ile tai kumwifa ya ningwa modula ei ina ko ashike oivike ivali opo ika dilongele.
Shotete osheshi shi talala mboombo sha ningwa ashike oshivike eshi omo omupedu-minista mouministeli womadu nomatulululo Bernadus Swartbooi a kanifa oilonga molwaasho a anya okuyandja ombili moipafi. Swarbooi otaku hokololwa a ninga omupopyo nai eu ninga pefimbo loshivilo shoKai// koHoachannas, eu ningila Minista yoshikondo shaye Utoni Nujoma.

Odula ei yoneudo oya ninga yoo ondjokonona eshi lwotetetete mondjokonona onhele yoilonga ya patwa molwa eenghalo dovanailonga dihe li nawa. Nonande penya naapenya moshilongo mwa kala omanyenyeto noiningwanima omo eenghalo dovanailonga dihe li nawa, ina pa katukwa nale eenghatu da nyaa keonga. Onghene ofabrika yeedopi yedina Mariental Brick oya ninga oshihopaenenwa kutya ehepeko lovanailonga moNamibia otali dulu okueta fiyo opepato longeshefa.

Mo 2016 omwa ningwa yoo oiningwanima tai halula, unene tuu oiponga yeetuwa da kala nokutema omundilo mopate. Shimwe nokuli shomoiningwanima oyo oshosho sha twaalela eemwenyo dovanhu 15. Modula oyo tuu ei, omo vali ovakainhu vavali komunghulofuta va kwatwa po omolwa edipao ile onghendabala yedipao lounona vavo vene. Shimwe shomoiningwanima oyo opo sha ningwa, omo omukainhu omunamido 28 ali ta kendabala okudipaa ounona vaye vavali nomukalo wokuva nwefa omiti daye dee ARV. Omukainhu ou okwa holoka momhangu oshivike eshi. Senobia Seas (32) naye yoo okwali a tulwa konima yekumba molwaashi vati a dipaa okaana kaye Ava Owoses keedula nhatu.

Shimwe shishi okudimbulukiwa nawa mo2016 osheshi kwa etwa koluhaela osho tashi fekelwa kutya oimbuluma yokulandifa po ovanhu ya ninga eedula dihapu, nosha twala fiyo omekwato po lomukwashiwana waDRC Pedro Marcelino Mousongela oo fiyo onena eli mokalimosho.

Odula yo2016, ita i dulu okukala ina mu dimbulukiwa efyo lomunapolitika Hidipo Hamutenya, oo a xulifa muKotoba.
Eenghundana tadi hafifa da ningwa omudo ou, imwe oya ningwa moshikondo shouhaku omo oshipangelo shaMedipark sha ninga ondjokonona eshi sha twika omunhu oshitishanafiyo, oshikando shotetetete moNamibia.

Ekengho lovalumehu nalo oshimwe yoo shomoinima oyo ya kala tai dana onghandangala moshilongo onga oshitukulwa shokulwifa oHIV Aids, nolali la enda nawa.

Opa kala yoo omapopyo opo ngeno ounona voukadona vakale tava pewa oshali oupeds vokuli kwafela ngee veli komafimbo. Nonande ina ku hangwa efikilo moshinima eshi, osha fimana opo eenghundafana edi diye mo vali shaashi oshinima sha fimana neenghono. Momaudano, ovamati vaNamibia ova eta omapole keumbo. Omafiku aa Julius Indongo okwa yandja imwe nopedu kuEduard Troyanovsky waRussia osho she mu pefa epaya loIBO/IBF.

Ananias Shikongo naye okwali yoo a etela oshilongo eembadi doshingoli okudja kOlympics. Komaudano oko tuu oko, oNamibia Football Association nayo oya holoka luhapu moifo eshi oMTC yelikufa mo mokuyambidida oliga yaNamibia. Omafiku aa ehangano loDebmarie ola tokola opo li kale tali yambidida NFA. Shimwe vali sha holoka moipalanyolo yomoshilongo noshadana onghandangala meenghundana osho olweendo lomupresidente Hage Geingob koAmerica oko ye nosheendo shaye va ningile omafiku 24. Okwa ningile yo omafiku taku tuwa eemhata nokuhokololwa ehokololo linasha nokumina oshimongwa shoPhosphate mefuta laNamibia.

Okwali taku hokololwa kutya Ehangano loNamibia Phosphate Mining ola li la pelwa odjapo yokumina enono lophosphate sha ningilwa monanguwi. Osho osha eta fiyo opopo ehangano olo la ka kufululwa odjapo oyo nelalakano okulandula omishangwa odo dili mondjila. Oshiongalele Shomaxupilo (Investment Conference) osho shali moshilongo nosha eta ovanhu vahapu vomounyuni nasho oshimwe shomoinima oyo ya dana onghandangala. Ovalongi moshilongo navo ovali yoo vaya mekangha tava pula ewedelo leendjabi.
Kondje yoshilongo, ounyuni owa lila oo ali nale omupresidente waCuba Fidel Alejandro Castro Ruz, oo a xulifa momafiku 25 Novemba. Ounyuni owa haluka yo eshi Donald Trump a findana a ninge omupresidente wAmerica, a denga mo Hilary Clinton.

MoSouth Africa namo neudo omwa kala omakuyunguto manene, omo ovanafikola vakala tava kondjifa opo elongo lopombada likale loshali. Oshilongo osho tuu osho, ita shi dulu nande okuxulifa oiningwanima yomo2016, ina shi popya efundja linene olo lali la hanauna shihapu moshilongo omo.

Ngaashi omwiimbi ta ti, “omudomukulu nau xule po noudjuu noiponga, nau xule yoo nomapandulo.”

editorial-7 editorial-6 editorial-5 editorial-4 editorial-3

Leave a Reply

Your email address will not be published. Required fields are marked *