Debmarine Namibia a gandja ekwashilipaleko koNFA

Omaudhano
Friday, 16 December 2016 103 Views 0 Comments
Debmarine Namibia a gandja ekwashilipaleko koNFA

Windhoek- Ethigathano lyekopi lyoNFA olya tegelelwa li ka tameke mu Febuluali 2017.
Ethigathano ndika lya li nale hali kwashilipalekwa kehangano lyoBidvest Namibia olya tseyithwa tali ka tameka ishewe oku dhanenwa konima sho pwa monika omukwashilipaleki gwalyo omupe.

Omukwashilipaleki gwethigathano ndika uule womimvo ndatu tadhi landula ota kala Debmarine Namibia. Ye nguka okwa uvaneka ta ka longitha oshimaliwa shi thike poomilliona dhooN$14,1 uule womimvo ndatu. Ko kutya ehangano ndika hali hadha osho wo hali fulu okawe mefuta otali kala hali gandja konyala oomilliona dhooN$4,7 omumvo kehe.

Euvathano lyekwashilipaleko ndika pokati kaNFA na Debmarine Namibia olya li lya shainwa oshiwike shayi moVenduka.
Omukuluntuwiliki gwa Debmarine Namibia sho a popi pethimbo lyeuvathano tali shainwa, Otto Shikongo okwa ti yo oyu uvite uuntsa sho ye li oshitopolwa shuudhano wetanga lyokoompadhi na unene tuu sho uudhano mbuka wu holike kaantu oyendji.

Okwa ti moku kwashilipaleka uudhano mbuka ehangano lye olili oshitopolwa shoonkambadhala dhoku dheula aagundjuka opo ya vule oku dhana uudhano mbuka.

Okujoina NFA moku kwashilipaleka uudhano mbuka wekopi lyaNFA “osho epungulo lyomwaalu goomilliona dhooN$14,1 onkene otandi indile kongundu yandje osho wo koNFA opo alikana ya soshimpwiyu kutya kehe osenda moshimaliwa shika oya longithwa naanaa ngaashi yina okulongithwa.”

Onkene se ni oshimpwiyu kutya iimaliwa mbika inayi longithwa po kaanambelewa opo ye ki ilandele iihauto yoobakkie dhooNavarra.Iimaliwa mbyoka tse tatu gandja oya longwa nuudhiginini koshigwana, sho osho tandi tile natu moneni kutya osenda kehe ya yo oya longithwa nawa noku shiwike kutya oya ya moshike” Shikongo a indile.

Omupresidente gwaNFA Frans Mbidi moku taambako ekwashilipaleko ndika okwa pandula Debmarine Namibia sho a hogololola okunkondopeka aagundjuka noshigwana okupitila metanga lyokoompadhi.

“Uudhano wetu wetanga lyokoompadhi owa kala noku ehamekwa keshongo lyoonzo dhopashimaliwa natse aawiliki yuudhano mbuka otwa gana kutya otatu tsikile noku kondja omolwuuwanawa waamboka tse twa kalelapo.

Nena otwa nyayukwa unene sho tatu tameke olweendo lwomimvo ndatu naDebmarine Namibia” Mbidi a ti.

Okwa tsikile a ti ethigathano lyekopi lyaDebmarine Namibia olyo alike ompito moka oospana adhihe moshilongo okuza pondondo yopevi sigo opombanda tadhi kutha ombinga noku thigathana po.

“Otandi shilipaleke kutya NFA otaka longekidha nawa ethigathano ndika uule womimvo ndatu dheuvathano oku tala kutya ndhika otadhi ka kala omiwanawa osho wo otadhi kala dhu udha esindano. Otandi uvaneke kutya otatu ka ulika nkene osenda kehe yoshimaliwa shika ya longithwa tatu shi ningi pamukalo gwopaithano lela’ Mbidi a uvaneke.

Edhingoloko lyuudhano wokudhana nokudhengwamo mekopi ndika moka tamu dhanwa koosipana dhoko first no second division otali tameke mu Febuluali opo nee konima oospana dhomoNPL otadhi keya mondambo moka muna oospana omilongo 32, naandhika otadhi ka thigathanapo nokudhengathana.

Amushanga Ndajyi gwa NFA Barry Rukoro okwa fatulula kutya okuza medhingoloko lyoospana 32 ospana kehe otayi ka pewa oodola 18 000 osigo opehulilo lyuudhano. Iimaliwa mbika otayi gandjwa omolwa omailongekidho goospana ndhika. Omanga omusindani guudhano mbuka otaka pewa ooN$500 000.

Debmarine Namibia ehangano lyuukumwe pokati kepangelo lya Namibia nehangano lyokumina okawe lya De Beers , naandika olya dhikilwe po omumvo 2001 no hali fulu okawe momeya ga Namibia.

 

Leave a Reply

Your email address will not be published. Required fields are marked *