Omathaneko okuyambulapo ondoolopa yaNiipa ogeli miilonga

Omaliko
Friday, 16 December 2016 105 Views 0 Comments
Omathaneko okuyambulapo ondoolopa yaNiipa ogeli miilonga

ONIIPA – Elelo lyondoolopa yaNiipa otali longo nuudhiginini oku opaleka omahala gokutunga omagumbo opo aakalimo yamo ya vule okumonenwa omalukalwa.

Etulo miilonga lyethaneko ndika limwe lyomomathaneko gondoolopa ompe ndjoka opo ya tulwa pomuthika nguka omvo gwayi, olya kolekwa kuMeya gwOniipa Immanuel Kambonde ngoka a shunwa miilonga yuukwatelikomeho gondoolopa ndjika oshiwike shayi.
Kambonde okwa hokolola kutya oompangela nomathaneko otaga yi nawa komeho, a ti otaya lalakanene ondoolopa ndjoka yi kale yina ehumokomeho tali i monikila. Ta ti oshi li oshinakugwanithwa shawo oku kwashilipaleka kutya aakalimo yomondoolopa oya mona omayakulo agehe ngoka ha ga gandjwa pomuthika gwondoolopa.

Meya okwa ti elelo lyOniipa kohi yewiliko lye, olye shi pondola oku adha oyindji yo miithanekwa mbyoka ya li yina okulongwa oomwedhi 12 dha piti.

Okwa ti oya adha omalalakano ngoka nonando ka sha li oshipu oku shi ninga.
Iinakugwanithwa yimwe mbyoka ya manitha ongaashi oku etamo omunambelewa omukuluntu melelo lyondoolopa osho wo aanambelewa yalwe mboka taya gandja omayakulo gopomithika dha yooloka mondoolopa, oya tulapo wo omathaneko ga nkene taya longo moku yambulapo noku humitha komeho ondoolopa ndjoka.

“Otuli wo mokati koonkundathana nomahangano ngaashi Nored ngoka ha andjaganeke olusheno, Namwater ngoka ha gandja omeya komahala nomahala osho wo omahangano omakwawo omagandji gomayakulo ga yooloka,” Kambonde ta ti.

Okwa ti nonande ondoolopa yOniipa yeya pethimbo ndyono oshilongo sha taalelwa komashongo ogendji unene ngaashi ompumbwe yoshimaliwa, Meya okuna omukumo oshoka elelo lyondoolopa yawo pamwe naakalimo yamo oyi imanga kumwe okuyi humitha komeho, noku yambulapo aakalimo yamo.

“Pethimbo ndika nando opena omukundu gwevi, otwi itaala kutya nguka ina gu ya okukalelela, ashike mondoolopa yetu otwa tulapo omilandu tadhi vulika tse tu kandulepo omikundu nomandangalati ngoka geli mondjila taga imbi tuye komeho nokulundulula onkalo yaantu yetu, nehumokomeho lyondoolopa yetu,” Kambonde ta tsikileko.

Okwa ti ondjodhi yawo ndjoka tayi kalelele oyo okugandja omagumbo nomahala gomalukalwa kaakalimo yomondoolopa.
Kambonde okwa shunwa moshipundi shuuMeya natango moondoolopa ndjoka, shoka hashi ningwa aluhe konima yomvula yimwe.

Yamwe yomiilyo yewiliko lyondoolopa ndjoka ongaashi omupevi Meya Lovisa Iikali, Tomas Matsi ngoka eli Omunashipundi gwewilikongundu , Hileni Iidhogela , David Shikalepo Kambonde, Japhet Augustus na Laina Lovisa Amutenya oyo iilyo yilwe melelo lyondoolopa ndjoka.

Leave a Reply

Your email address will not be published. Required fields are marked *